Ітак, у нас ёсць некалькі сцэнароў правядзення анлайн-заняткаў, для кожнага з якіх будзе адрознівацца набор інструментаў, якім трэба авалодаць нашаму герою. Давайце разбірацца з рознымі сцэнарамі:

Сцэнар 1. Відэаўрокі пры сінхронным навучанні. У гэтым выпадку тэхнічныя веды, якія патрабуюцца ад настаўніка, адносна сціплыя. Па-першае, трэба абраць праграму для відэасувязі, якая будзе выкарыстоўвацца. Часцей за ўсё гэта Zoom, Google Meet, Microsoft team, часам бывае Skype. Больш за ўсё магчымасцяў у Зума, ён дазваляе выкарыстоўваць анлайн-дошку, арганізоўваць групавую працу і супрацу праз анлайн-сервісы. У такім выпадку настаўніку спатрэбяцца навыкі працы з сервісамі відэаўрокаў, презентацыямі і малюнкамі.   

Сцэнар 2. Відэазапісы для курса, які можна прахадзіць асінхронна (МООС). Калі настаўніца ці настаўнік рыхтуе класічны масавы адкрыты анлайн-курс, то відэа для яго рыхтуюцца загадзя. Такі варыянт рэалізацыі самы складаны. Ён патрабуе ці знешняй дапамогі (калі ёсць людзі, якія арганізуюць здымку і мантаж), ці хаця б мінімальных ведаў у сродках відэазапісу. Хаця можа выглядаць складана на першы погляд, часта нешта прыстойнае можна зрабіць і калі наш герой не з’яўляецца прафесіяналам у гэтых сферах. Сучасныя праграмы працы з медыя дазваляюць зрабіць відэаролікі і непадрыхтаванаму карыстальніку. Пры такім сцэнары звярніце ўвагу на раздзелы: праца з малюнкамі, запіс відэа  

Сцэнар 3. Курс без відэа. Неабавязкова навучальны курс мусіць утрымліваць відэачастку. Асабліва відэачастку, якую запісвае настаўнік. Часта можна ці выкарыстоўваць тыя медыя, якія ўжо існуюць (напрыклад, убудаваць у курс ролікі з youtube). Ці курс у прынцыпе можа мець альтэрнатыўны фармат: скажам, квэст ці гульня, дзе вучань/вучаніца крок за крокам атрымлівае новае заданне. У якасці медыя можа быць усё што заўгодна: артыкулы з іншых сайтаў, вэбкамеры па ўсім свеце, рэкламныя ролікі, сервісы для анлайн-эксперыментаў па прыродазнаўчых навуках. У гэтым выпадку настаўніку важна не столькі валодаць пэўнымі тэхнічнымі інструментамі, колькі шырока мысліць і ведаць пра магчымасці. Аднак і ў гэтым выпадку варта не забываць пра якаснае афармленне візуальнай часткі курса: напрыклад, пра малюнкі.